Uyu munsi kuwa 2 Werurwe 2024, Umuyobozi Nshingwabikorwa ushinzwe Itorero n’Iterambere ry’Umuco Uwacu Julienne, yatangije ku mugaragaro Itorero ry’abakozi ba WASAC ribera mu Kigo cy’Ubutore cya Nkumba giherereye mu Karere ka Burera.

Mu ijambo rye, yabasobanuriye ko iterambere rirambye u Rwanda rwifuza rigomba kubakira ku muco, abasaba kwimakaza indangagaciro na kirazira z’umuco nyarwanda mu byo bakora byose.

Yabashishikarije kugira imitekerereze mpinduramatwara, muri iri Torero bakireba bakishimira aho bakoze neza, bakinenga aho batakoze neza bagamije gukosora kugira ngo WASAC ibashe kugera ku ntego zayo. 

Yabasabye kandi kuzahiga imihigo isubiza ibibazo bihari, abizeza ubufatanye bwa MINUBUMWE mu gukurikirana ishyirwa mu bikorwa ryayo.

Iri Torero rigamije gutoza abakozi ba WASAC Indangagaciro z’umuco nyarwanda na kirazira, imyitwaririre mbonezamurimo batanga serivise inoze, icyerekezo cy’Igihugu n’uruhare rwabo mu kugeza amazi meza, isuku n’isukura ku baturarwanda bose, hagamijwe kubaka u Rwanda twifuza.

Muri iri Torero Intore zizatozwa mu buryo butanu bukoreshwa muItorero burimo imyitozo ngororamubiri, akarasisi n’intambwe y’intore, imikoro n’imikorongiro, ibiganiro, gutarama no guhiga.