Ku wa 18 Gicurasi 2025, Minisitiri Dr Bizimana Jean Damascene yifatanyije n’abaturage b’Uturere twa Nyabihu na Rubavu mu Kwibuka ku nshuro ya 31 Jenoside yakorewe Abatutsi ku Rwibutso rwa Bigogwe rushyinguyemo Abatutsi basaga ibihumbi 9. Harashyinguwe indi mibiri 5 yabonetse.

Mu kiganiro yatanze ku mizi ya politiki y’ivanguramoko ryagejeje kuri Jenoside yakorewe Abatutsi, yagaragaje uruhare rw’Ikigo cya Gisirikari cya Bigogwe giherereye mu Karere ka Nyabihu, mu kwica Abatutsi kuva mbere y’umwaka wa 1994.

Ati, “Bigogwe yabaye indiri y’itegurwa rya Jenoside yakorewe Abatutsi binyuze mu gisirikari cyatoje abazakora Jenoside, aho igisirikari cyigishije Abahutu kwica Abatutsi vuba bakoresheje akagozi bitaga ‘corderette’ bakabanigishije mu ijosi. Umutwe w’abicanyi wahabwaga iyo myitozo witwaga 'Turi Hose’ ni hano watorezwaga. Jean Paul nturanyenabo ni umwe mu batozaga abo bajenosideri baje kubarimbura.”

Minisitiri Dr Bizimana yanatashye ku mugaragaro Urwibutso rushya rwa Bigogwe rwubatswe mu Karere ka Rubavu. Mu butumwa yanditse mu gitabo cy’abashyitsi basura uru Rwibutso, yibukije ko Jenoside yakorewe Abatutsi yateguwe, itatewe n’ihanurwa ry’indege ya Habyarimana nk’uko abagoreka amateka babivuga.

Ati, “Jenoside yakorewe Abatutsi yateguwe mu gihe cy'imyaka 4 (1990-1994). Ikigo cya Gisirikari cya Bigogwe cyatorejwemo Interahamwe zifatanya n'abasirikari kwica Abatutsi mu myaka ya 1990, 1991, 1992, 1993 na 1994. Jenoside yashegeshe aka Karere ntizongera. U Rwanda rufite ubuyobozi bwiza burangajwe imbere na FPR-Inkotanyi yagaruriye Abanyarwanda icyizere. Dukomeze kwibuka duharanira kuba UMWE no kubaka u Rwanda rwa twese turwanya jenoside n'ingengabitekerezo yayo.”

Kwibuka Jenoside yakorewe Abatutsi ni umwanya wo kwiga amateka no gusobanukirwa n’icyasenye ubumwe bw’Abanyarwanda kugeza hateguwe hagashyirwa mu bikorwa Jenoside yakorewe Abatutsi mu 1994, kuganira ku ngaruka zayo no kwiyibutsa umukoro dufite wo gukomeza kubaka u Rwanda twifuza, ruzira ingengabitekerezo ya jenoside.

Abanyarwanda twiyemeje guhora twibuka Jenoside yakorewe Abatutsi nk’amateka ashaririye yaranze Igihugu, dukwiye kwigiraho kugira ngo adufashe kurwanya no gukumira ingengabitekerezo y’urwango n’amacakubiri yasenye umuryango nyarwanda.

Jenoside yakorewe Abatutsi mu 1994 ni isomo Abanyarwanda twigiyeho ko ubumwe bwacu buruta ibyadutanya uko byaba bimeze kose. Amahanga na yo akwiye kwigira kuri aya mateka kugira ngo dushyize hamwe hubakwe ejo heza h’abatuye Isi.