Ku wa 3 Gicurasi 2025, Minisitiri Dr Bizimana Jean Damascene n’abandi bayobozi, bifatanyije n’abaturage b’Akarere ka Nyamagabe mu Kwibuka ku nshuro ya 31 Jenoside yakorewe Abatutsi, ku Rwibutso rwa Cyanika rushyinguyemo Abatutsi basaga ibihumbi 40. Hashyinguwe indi mibiri 53.

Mu kiganiro ku mizi ya politiki yagejeje kuri Jenoside yakorewe Abatutsi, Minisitiri yatanze impanuro ku Banyarwanda bose, cyane cyane abitabiriye igikorwa cyo kwibuka ku rwibutso rwa Jenoside rwa Cyanika, ati, “Aya mateka ya politiki mbi yakozwe n'abitwikiriye umwambaro wa politiki n'uw'abihayimana, yaranzwe no kumvisha Abahutu ko u Rwanda ari urwabo bonyine, Abatutsi bakaba abanyamahanga mu Rwanda, dukwiye kuyakuramo amasomo.”

Yakomeje agira ati, “Ni amasomo kuko abishe ntacyo bungukiyemo. Twagize amahirwe RPF-Inkotanyi ihagarika Jenoside itugarurira amahoro. Ayo mahoro ni yo tugomba gusigasira, kuko ari cyo Inkotanyi zarwaniye. Twirinde abakibiba urwango bakoresheje imbuga nkoranyambaga bakomeje guhakana no gupfobya Jenoside yakorewe Abatutsi."

Yibukije ko jenoside ari icyaha kibanzirizwa n'umugambi wo kwica, gukomeretsa ku mubiri, no mu mutwe, no gushyira mu buzima bubi itsinda ry'abantu hashingiwe ku bwoko nk'uko byagenze ku Batutsi kuva mu mwaka wa 1959. 

Mu 1963, ni bwo bwa mbere ubwicanyi bwakorewe Abatutsi muri Perefegitura ya Gikongoro, bwiswe Jenoside ku rwego mpuzamahanga, kandi ubushakashatsi bugaragaza ko bwari bwateguwe.

Kwibuka ni umwanya wo kwiga amateka no gusobanukirwa n’icyasenye ubumwe bw’Abanyarwanda kugeza hateguwe hagashyirwa mu bikorwa Jenoside yakorewe Abatutsi mu 1994, kuganira ku ngaruka zayo no kwiyibutsa umukoro dufite wo gukomeza kubaka u Rwanda twifuza, ruzira ingengabitekerezo ya jenoside.

Abanyarwanda twiyemeje guhora twibuka Jenoside yakorewe Abatutsi nk’amateka ashaririye yaranze Igihugu, dukwiye kwigiraho kugira ngo adufashe kurwanya no gukumira ingengabitekerezo y’urwango n’amacakubiri yasenye umuryango nyarwanda.

Jenoside yakorewe Abatutsi mu 1994 ni isomo Abanyarwanda twigiyeho ko ubumwe bwacu buruta ibyadutanya uko byaba bimeze kose. Amahanga na yo akwiye kwigira kuri aya mateka kugira ngo dushyize hamwe hubakwe ejo heza h’abatuye Isi.