Kuri uyu wa 11 Gicurasi 2024, Umunyamabanga Uhoraho Uwitonze Mahoro Eric yasoje Itorero ry’abakozi b’Ikigo cy’Igihugu Gishinzwe Gukwirakwiza Amazi, Isuku n’Isukura (WASAC Ltd), ryaberaga i Nkumba mu Karere ka Burera, aho bamaze iminsi batozwa indangagaciro na kirazira by’umuco nyarwanda bizabafasha kunoza inshingano zabo.

Yabasabye kwimakaza imitangire myiza ya serivisi z’amazi, isuku n’isukura, bazirikana ko amazi ari ubuzima kandi ko ubuzima budashoboka ahatari amazi, bityo bakaba bakwiye kubahisha izina ry’Ubutore bahawe ry’Indemyabuzima.

Yabibukije ko Guverinoma y’u Rwanda yakoze ibishoboka byose yubaka ibikorwaremezo by’amazi, isuku n’isukura, irabibegurira kugira ngo bakoreshe imbaraga zabo n’ubwitange mu kubibyaza umusaruro, baharanira ko Umuturarwanda wese abona amazi meza.

Yabasabye ko kuba kuba umusemburo w’impinduka nziza muri nyuma y’iri Torero, banoza imikorere n’imikoranire mu kazi kabo ka buri munsi, barangwa n’imyitwarire mbonezamurimo, bakora nk’abikorera, biganisha ku cyerekezo cy’Igihugu 2050.

Muri uyu muhango, habayeho na Kora Ndebe yo gutanga amazi meza yo kunywa ku Ntore zizajya zitabira Itorero, aho abakozi ba WASAC bitabiriye Itorero batanze ikigega n'uburyo bwo kuyungurura amazi, hakaba hashyizweho ibuye ry'ifatizo ahazubakwa umuyoboro amazi ajya afatirwaho.

Itorero ryasojwe uyu munsi ni icyiciro cya Kabiri cy’abakozi ba WASAC, nyuma y’icyiciro cya mbere cyatojwe muri Werurwe 2024, bikaba biteganyijwe ko muri rusange hazatozwa abakozi 1500 ba WASAC Ltd, aho abasigaye na bo bazatozwa muri uku kwezi kwa Gicurasi.

Intore zitozwa mu buryo butanu busanzwe bukoreshwa mu Itorero burimo imyitozo ngororamubiri, akarasisi n’intambwe y’intore, imikoro n’imikorongiro, ibiganiro, gutarama no guhiga.