Kuri uyu wa 10 Mutarama 2025, Minisitiri Dr Bizimana Jean Damascene yitabiriye inama nyunguranabitekerezo ku bumwe n’ubudaheranwa bw'Abanyarwanda mu Karere ka Nyaruguru yabereye mu Murenge wa Kibeho. Iyi nama yitabiriwe n’abayobozi batandukanye n’abaturage baturutse mu Mirenge 14 igize Akarere ka Nyaruguru.

Mu kiganiro yatanze ku bumwe n’ubudaheranwa bw’Abanyarwanda, Minisitiri Dr Bizimana yashimangiye ko uko umuntu akenera umwuka kugira ngo abeho ari na ko Abanyarwanda dukeneye ubumwe kugira ngo u Rwanda rubeho none n’ejo no mu binyejana byinshi biri imbere ubwo tuzaba tutakiriho.

Iyi nama nyunguranabitekerezo yabaye nyuma y’ibiganiro byakorewe mu Mirenge igize Akarere ka Nyaruguru kuva ku wa 26 Ukuboza 2024 kugeza ku wa 2 Mutarama 2025, byahuje ubuyobozi bw’Akarere, inzego z’umutekano n’ibyiciro bitandukanye by’inzego zatowe. Muri ibyo biganiro byagaragaye ko hari ibikorwa bimwe bibangamira ubumwe n’ubudaheranwa bw’Abanyarwanda.

Minisitiri Dr Bizimana yifashishije gihamya z’amateka, yagaragaje uko ubumwe bw’Abanyarwanda bwasenywe n’abakoloni n’abamisiyoneri ndetse na Repubulika ya Mbere n’iya Kabiri, asaba abaturage ba Nyaruguru n’Abanyarwanda muri rusange kurwanya amacakubiri n'ingengabitekerezo ya jenoside bubakira ku kuri, babumbatira ubumwe bw’Abanyarwanda, bazirikana ko kubaka u Rwanda rwa twese ari inshingano ya buri wese.