Ku wa Kane tariki ya 17 Werurwe 2022, Minisitiri w’Ubumwe bw’Abanyarwanda n’Inshingano Mboneragihugu yasoje Itorero ry’Intagamburuzwa  za AERG icyiciro cya 7 ryaberaga I Nkumba mu kigo cyigisha Ubutore.

Ubwo yasozaga ku mugaragaro itorero bari bamazemo icyumweru batozwa indangagaciro zitandukanye zizabaranga mu rwego rwo kubaka igihugu kizira ivangura n’ingengabitekerezo ya Jenoside yifashishije indirimbo ya Rugamba Cyprien igira iti “Ntumpeho”, yasabye izo Ntore kuba imfura aho kutarenga nyirantarengwa, aho yababwiye ko kunyuranya n’ibyo byaba ari ugukora ishyano. Yagize ati: “Gukora ishyano ni ugukora ibidakorwa, ni ugukora ibizira mu muco nyarwanda, ni ukurenga nyirantarengwa. Mwebwe rero urubyiruko, inkumi n’abasore ntimuzarenge nyirantarengwa, ntimuzakore ishyano ahubwo muzabe imfura”.

Yongeyeho ko imfura ari umuntu udakosa, utagira umugayo, urangwa n’ibyiza gusa, n’ubwo muri kamere ya muntu hataburamo guteshuka. Yabasabye kutaba ba nyamwigendaho ko ahubwo bakwiye gukomeza ubufatanye bavanye mu itorero bakabukomereza muri AERG no hanze yayo mu mashuri no mu kazi bityo imbaraga zikaba nyinshi zikarengera igihugu.

Yabibukije kuzahigura imihigo bahigiye mu itorero mu bufatanye irimo kurwanya abahakana n’abapfobya Jenoside yakorewe Abatutsi mu 1994,  kwitangira igihugu aho bibaye ngombwa, gukunda umurimo no gukorera igihugu,  kuko utazi iyo ava atamenya iyo ajya.

Intore ziyemeje kubyaza umusaruro wubaka igihugu n’Abanyarwanda ubumenyi zaherewe mu Itorero, ziyemeza cyane cyane kuba ingabo zirwanira kuri murandasi, zihangana n’abahakana ndetse n’abapfobya Jenoside yakorewe Abatutsi mu 1994.

Iri Torero ryari rifite insanganyamatsiko igira iti “Ubudaheranwa, inkingi yo kwigira nyako” akaba ari icyiciro cya karindwi kigizwe n’abasore n’inkumi 382, naho mu byiciro bitandatu byitabiriye iryo torero mu myaka ishize kugeza ubu byanyuzemo intore zigera ku 2000.