Kuri uyu wa Mbere tariki ya 14/03/2022 hirya no hino mu gihugu hatangijwe Urugerero rudaciye ingando icyiciro cya Cyenda (9)  ruhuza abanyeshuri barangije amashuri yisumbuye mu mwaka w’amashuri 2020/2021.  Uru rugerero rufite insanganyamatsiko igira iti: “Duhamye umuco w’ubutore ku rugerero rwo kwigira”

Igikorwa cyo gutangiza urugerero ku rwego rw’igihugu cyabereye mu Karere ka Rubavu ahiswe “Komine Rouge” mu gihe cya Jenoside ahakozwe umuganda wo gukora isuku ku Rwibutso rwa Jenoside  yakorewe Abatutsi . Intore n’abatoza batemeye ubusitani , batera ibiti n’indabo z’ubwiza ku rwibutso.

Nyuma y’umuganda,  Minisitiri w’Ubumwe bw’Abanyarwwanda n’Inshingano Mboneragihugu  Dr.  Jean Damascène BIZIMANA yahaye intore z’Inkomezabigwi icyiciro cya 9 ubutumwa burebana n’indangagaciro zigomba kubaranga mu gihe cy’urugerero ndetse na nyuma yaho mu buzima bwa buri munsi.

Yababwiye ko Urugerero rurimo ibice bibiri aribyo: guhamya umuco w’ubutore  kuko intore bivuga  umuntu w’indashyikirwa, usumba abandi, utagira icyasha  kandi urangwa n’ishyaka, n’Urugerero rwo kwigira kuko u Rwanda ruzazamurwa n’Abanyarwanda ubwabo. Yagize ati: “Ntabwo tuzahora duteze amaso, amatwi, n’amaboko amahanga, ahubwo amahanga tugomba gufatanya ariko nitwe tugomba kwigira, nitwe tugomba kwishakamo ibisubizo, nitwe tugomba kwiteza imbere, kandi nitwe tugomba kwiyubakira igihugu no kukirinda”.

Yabasabye guharanira  ubumwe bakabugira ubwabo, bakabugirana hagati yabo n’imiryango yabo kandi bakabugirana n’igihugu. Mu zindi ndangagaciro yabakanduriye kugira no kwimakaza harimo Kugira ubupfura aribyo kugira ubugwaneza no kwanga umugayo, Kugira ishyaka  aribyo gukora ibyo wiyemeje neza kandi mu gihe gito, Kugira ubwangamugayo aribyo  kutagira ubusembwa ubwo aribwo bwose, Kugira ubwitange n’ubufatanye, ubushishozi kuko bizabafasha gutoranya iby’ingenzi byo gukora nta guhubuka kandi bagakora amahitamo akwiye aganisha u Rwanda aheza.

Mu bikorwa biteganyijwe gukorwa muri uru rugerero harimo: kwita ku bikorwaremezo, gufasha muri gahunda zo kwitegura Kwibuka ku nshuro ya 28 Jenoside yakorewe Abatutsi, gukangurira abaturage igikorwa cyo kwirinda Covid-19 no
kwikingiza, gufasha muri gahunda z’uburezi no guca ubuzererezi, kubungabunga ibidukikije, gufasha kumva imikoreshereze y’ikoranabuhanga , gutoza ubuhanzi butoza ishyaka ry’u Rwanda, n’ibindi. Biteganyijwe ko uru rugerero ruzasoza tariki ya 25 Gicurasi 2022.