Minisitiri w’Ubumwe bw’Abanyarwanda n’Inshingano Mboneragihugu Dr. Jean Damascène BIZIMANA yakanguriye urubyiruko rwibumbiye mu muryango w’abanyeshuri barokotse Jenoside yakorewe Abatutsi - AERG ruri mu Itorero i Nkumba mu Kigo cy’Ubutore  gusoma no gucukumbura amateka y’u Rwanda  bakamenya ukuri kuri yo.

Ni mu Kiganiro yabahaye kuri iki Cyumweru tariki ya 13/03/2022 cyitwa : ‘Uruhare rw’Intagamburuzwa mu kugaragaza ukuri ku mateka ya Jenoside yakorewe Abatutsi, guhangana n’abayipfobya bakanayikakana no kurwanya ingengabitekerezo ya Jenoside’.

Ubwo yaganiraga n'uru rubyiruko, yababwiye amateka y’u Rwanda kuva mu gihe cy’Ubukoloni na nyuma yaho, abagaragariza uruhare rw’Abakoloni mu gutandukanya Abanyarwanda bakabaremamo ibice.  Yakomoje kandi ku buryo ubuyobozi bwagiye bujyaho bwimakaje ayo macakubiri bigatuma abanyarwanda bagirana urwikekwe ndetse  biza kugeza u Rwanda kuri Jenoside yakorewe Abatutsi  muri 1994. Aha yashimangiye ko iyo Ubuyobozi butabishyiramo imbaraga Jenoside yakorewe Abatutsi itari kuba.

Minisitiri BIZIMANA yaboneyeho kubashishikariza gusoma cyane no gucukumbura ibirebana n’amateka y’igihugu cyabo ndetse n’aya Jenoside yakorewe Abatutsi  by’umwihariko kugira ngo barusheho  kugaragaza ukuri ku mateka ya Jenoside yakorewe abatutsi mu 1994 no kurushaho kuyasigasira. Yabamenyesheje ko kugira ukuri ku mateka y’u Rwanda bituma babasha guhangana  n’abayagoreka  cyane cyane abapfobya Jenoside yakorewe Abatutsi muri 1994 bityo bakagira uruhare mu gusigasira ubumwe bw’Abanyarwanda.

Iri Torero ry’Intagamburuzwa za AERG icyiciro cya VII rizatorezwamo intore zigera kuri 400 hagamijwe  kubafasha kurushaho kumenya amateka, kuyarinda, n’uruhare rwabo mu cyerecyezo cy’igihugu kandi barushaho kurangwa n’umuco w’ubudaheranwa. Rifite insanganyamatsiko igira iti:”Ubudaheranwa, inkingi yo kwigira nyako”