Kuri uyu wa 4 Ukuboza 2024, Minisitiri Dr Bizimana Jean Damascene yitabiriye igikorwa cyo gutangiza ibiganiro kuri Ndi Umunyarwanda muri Seminari Nkuru ya Nyakibanda iherereye mu Murenge wa Gishamvu mu Karere ka Huye. Ni mu rwego rw'ibiganiro bikorwa na MINUBUMWE ifatanyije na Unity Club mu rwego rwo guteza imbere Ubumwe n’Ubudaheranwa bw’Abanyarwanda.

Mu kiganiro yahaye abanyeshuri bo muri Seminari Nkuru ya Nyakibanda, Minisitiri Dr Bizimana yagaragaje ko Jenoside yakorewe Abatutsi ari ihame mpuzamahanga ritagibwaho impaka kuko yateguwe ikanashyirwa mu bikorwa n’ubutegetsi bw’u Rwanda bwariho, bikemezwa n’Umuryango w’Abibumbye n’Urukiko Mpuzamahanga Mpanabyaha rwashyiriweho u Rwanda (ICTR). 

Yifashishije ibimenyetso by’amateka, yerekanye uruhare rw’abakoloni n’abamisiyoneri gatolika mu gusenya ubumwe bw’Abanyarwanda, n’uburyo amashuri bashinze yakoreshejwe mu kwigisha ivanguramoko. 

Yabasabye kwitandukanya n’abihayimana bahakana bakanapfobya Jenoside yakorewe Abatutsi ku mbuga nkoranyambaga, bimakaza Ndi Umunyarwanda banayitoza abakilisitu, hagamijwe kubaka u Rwanda rwa twese, rufite abaturage bashyize hamwe barangwa n’urukundo n’ubupfura.

Ndi Umunyurwanda ni icyomoro cy’ibikomere twasigiwe n’amateka, ndetse ni igihango cyo kuba Abanyarwanda bubatse u Rwanda ruzira amacakubiri rushingiye ku ndangagaciro na kirazira by’umuco nyarwanda.

Abanyarwnada basabwa kwimakaza Ndi Umunyarwanda ikababamo, ndetse bakayisobanurira abatarayumva cyangwa abashaka kuyirwanya kubera inyungu zabo bwite zo kuyobya Abanyarwanda. 

Kuba umunyarwanda ni ukwibohora amateka yadutesheje agaciro kacu, ni uburenganzira n’inshingano za buri wese, ni ingufu zacu zo kwiyubaka no kubaka ejo hacu heza dusangiye.