Uyu munsi, ku wa 24 Gicurasi 2024, mu Kigo cy'Ubutore cya Nkumba habereye umuhango wo gusoza Itorero ry'Indemyabuzima za WASAC icyiciro cya 3. Uwo muhango wayobowe n' Umuyobozi Nshingwabikorwa ushinzwe Itorero no guteza imbere Umuco UWACU Julienne.

Mu ijambo rye, yashingiye ku nsanganyamatsiko yaryo igira iti: “Kwimakaza Indangagaciro z’Umuco Nyarwanda na Kirazira mu mitangire ya Servisi z’amazi, Isuku n’Isukura”, abashishikariza kubaka Igihugu gitekanye kandi kibereye buri wese, bimakaza imitangire myiza ya serivisi.

Yabibukije isezerano rya Guverinoma y’u  Rwanda ryo guharanira ko buri muturage agerwaho n’amazi meza n'isuku n’isukura. Yabasabye kuba umusemburo w’impinduka nziza, no gufata ingamba zo kunoza imikorere n’imikoranire mu kazi kabo ka buri munsi, biganisha ku cyerekezo cy’Igihugu 2050.

Muri Kora Ndebe, izo Ntore zahaye Ikigo cy'Ubutore cya Nkumba amazi meza yo kunywa, no kubaka aho Intore zizajya zikarabira mbere yo gufata amafunguro. Iki cyiciro ni cyo cya nyuma cyari giteganyijwe na WASAC Group. Ibyiciro byose uko ari 3, bikaba byaritabiriwe n'Abakozi bayo bagera kuri 1302.