Kuri uyu wa 19 Kamena 2024, MINUBUMWE ifatanyije na Minisiteri ya Siporo (MINISPORTS) na Minisiteri y’Urubyiruko n’Iterambere ry’Ubuhanzi (MoYA) n’ibigo bizishamikiyeho, twibutse abari abakozi ba Minisiteri y'Urubyiruko n'Amashyirahamwe (MIJEUMA), abakoraga siporo by’umwuga, abahanzi, urubyiruko n’abandi bafatanyabikorwa bazize Jenoside yakorewe Abatutsi. Byabereye ku Rwibutso rwa Kigali ku Gisozi.

Mu kiganiro yatanze, Minisitiri wa MINUBUMWE Dr Bizimana Jean Damascene  yagaragaje ko gusenyuka k’umuco nyarwanda byagaragarariye mu bategetsi nka Perezida Kayibanda na Habyarimana bigishijwe n’abakoloni na Kiliziya Gatolika, byubatse urwango rwatugejeje kuri Jenoside yakorewe Abatutsi muri 1994.

Yagarutse ku bayobozi bakuru n’abakozi b’iyari Minisiteri y’Urubyiruko no Guteza imbere Amashyirahamwe nka Nzabonimana Callixte na Bikindi Simon, yerekana uruhare rwabo mu gutegura no gushyira mu bikorwa umugambi wa Jenoside yakorewe Abatutsi.

Yerekanye ko Jenoside yakorewe Abatutsi imaze guhagarikwa, abayobozi b’abajenosideri n’abafatanyabikorwa babo b’Ababiligi bashyizeho ingamba zigamije gupfobya Jenoside bifashishije itangazamakuru n’abashakashatsi bashyigikiye Leta yakoze Jenoside.

Yashoje yibutsa ko abayobozi babereye u Rwanda bakwiye gushingira ku muco nyarwanda wo kwimakaza ubunyarwanda nk’uko byahoze mbere y’umwaduko w’abakoloni, bakarwanya amacakubiri ashingiye ku cyo ari cyo cyose cyasenya isano-muzi y’ubunyarwanda.