Minisitiri w’Ubumwe bw’Abanyarwanda n’Inshingano Mboneragihugu Dr Jean Damascène BIZIMANA yifashishije amateka yasobanuye ko ingengabitekerezo ya Jenoside atari umuco w’Abanyarwanda kuko nta muntu uvukana urwango.

Ni mu muhango wo gutangiza icyumweru cy’icyunamo gitangira iminsi 100 yo Kwibuka ku nshuro ya 28 Jenoside yakorewe Abatutsi muri Mata 1994 wabereye ku Rwibutso rwa Jenoside rwa Kigali ku Gisozi.

Mu kiganiro yagejeje ku bitabiriye uwo muhango  yavuzeko Abanyarwanda batavukanye ubugome bwo kwicana ko ahubwo amacakubiri afite inkomoko mu mateka. Yavuze ko Jenoside yateguwe kuva ku butegetsi bwa Kayibanda kugeza ku butegetsi bwa Habyarimana igashyirwa mu bikorwa. Iyo nzira yaranzwe no kuvangura abanyarwanda bashingiye ku bwoko ndetse n’uturere hibandwa ku gutoteza Abatutsi, baricwa, bavanwa mu mashuri ndetse no mu kazi. Yasoje ashimira politike nziza itavangura buri munyarwanda ahubwo iharanira ko Abanyarwanda baba umwe. Yagize ati: “ Turi heza kandi turagana heza, kandi  twahisemo kuba umwe”.

Mu buhamya bwatanzwe na Sibomana Jean Nepomuscene, yavuze inzira yanyuzemo mu gihe cya Jenoside mu cyahoze cyitwa Murambi yayoborwaga na Gatete akaza kurokoka. Yasoje ashimira Guverinoma y’Ubumwe bw’Abanyarwanda kuko ubu afite ubuzima bwiza kubera Leta yamufashije kwiga, kandi akaba yaratangije ibikorwa bihuza abana n’ababyeyi bishe n’abiciwe. Yavuze ko impano yumva uwarokotse wese yakwitura abamurokoye ari ukubababarira kandi we akaba yarabikoze.

Nyakubuhwa Prezida wa Repubulika Paul Kagame mu ijambo rye, yavuze ko nubwo igihugu cy’u Rwanda ari gito mu buso ariko ari igihugu kinini mu butabera,  ko hari ibihugu bibona u Rwanda nk’igihugu gito bagakerensa ibyo rwakoze mu butabera, nko kuba abakoze Jenoside bireze bakemera icyaha barahawe imbabazi. Yashimiye Inkotanyi kuba barahisemo kutihorera bagahitamo gutanga imbabazi. Yavuze ko ibyo bihugu binini bishaka  guha amasomo u Rwanda uko bigomba kugenda,  kandi iwabo ugasanga bagifite igihano cyo kwica. Yavuze ko nta muntu ugomba kwigisha Abanyarwanda uko bakwiye kubaho, kuko amateka banyuzemo yabigishije.

Mu bandi banyacyubahiro bitabiriye uyu muhango harimo abayobozi bakuru b’igihugu, Abahagarariye ibihugu n’imiryango mpuzamahanga mu Rwanda,inshuti z’u Rwanda, abahagarariye imiryango y’abarokotse Jenoside irimo IBUKA na AVEGA, GAERG, AERG nindi miryango ihuza abarokotse.