Kuri uyu wa 28 Gashyantare 2024, Umuyobozi Nshingwabikorwa ushinzwe Itorero no guteza imbere Umuco Uwacu Julienne, yitabiriye ibirori byo kwizihiza umunsi mpuzamahanga w’ururumi kavukire, byari bifite insanganyamatsiko igira iti «Tumenye Ikinyarwanda, ururimi rwacu ruduhuza».

Mu ijambo rye, yagaragaje ko abahanga mu burezi no mu kwigisha indimi bahamya ko iyo umwana yamaze kumenya neza ururimi kavukire rwe byoroha kwiga indimi z’amahanga, bityo asaba ibyiciro bitandukanye by’amashuri gushyira ingufu mu myigishirize inoze y’Ikinyarwanda.

Yifashishije imibare yavuye mu ibarura rusange ry’abaturage n’imiturire ryo muri 2022 ryagaragaje ko Abanyarwanda 99,7% bakoresha Ikinyarwanda, yasabye abantu bose batanga serivisi kuzitanga bakoresha ururimi Abanyarwanda hafi ya bose bumva ikinyarwanda.

Umunsi mpuzahanga w’ururimi kavukire washyizweho n’icyemezo cyafashwe n’Inama rusange ya UNESCO mu 1999 kubera akamaro gahanitse indimi kavukire zifitiye benezo. 

Uyu munsi ugamije gusigasira indimi kavukire ziri hirya no hino ku Isi kubera ko harimo zimwe na zimwe zigenda zicika kandi zihatse ubumenyi butandukanye ; akaba ari yo mpamvu zigomba kwitabwaho no gutezwa imbere.

Ibikorwa byo kwita ku ndimi kavukire nanone bigamije gufasha abantu kugira ubusabane no kungurana ubumenyi binyuze mu ndimi zabo, ikaba n’inzira yo gukomeza ubumwe mu bazivuga. Ubu bumwe ni bwo indirimbo yubahiriza Igihugu cyacu igarukaho igira iti, « Umuco dusangiye uraturanga, ururimi rwacu rukaduhuza. »

Ikinyarwanda nk’ururimi kavukire, ni ururimi umwana w’Umunyarwanda amenya bwa mbere, ni ukuvuga ururimi rwa mbere mu zo amenya akivuka, urwo avuga mbere y’izindi. Ni ururimi rutuma Abanyarwanda basangira imyifatire, imitekerereze n’imigenzereze imwe, kuko ari rwo muyoboro w’indangagaciro ziri mu muco wabo, rukaba ingobyi y’umurage w’abaruvuga.

Mu Rwanda, Ikinyarwanda gikoreshwa n’Abanyarwanda hafi ya bose, kikanakoreshwa n’abatari bake mu bihugu bituranye n’u Rwanda. Ubushakashatsi bunyuranye bugaragaza ko abavuga Ikinyarwanda bose hamwe bagera kuri Miliyoni 40 bagizwe n’abari mu Rwanda n’abari hanze yarwo. Kuba Ikinyarwanda gikoreshwa n’Abanyarwanda hafi ya bose, ni umusingi w’ubumwe.