Urubyiruko rwarangije amashuri mu mwaka w’amashuri wa 2022/2023 rwitabiriye Urugerero rudaciye ingando rw’Inkomezabigwi icyiciro cya 11/2023 rubera mu Mirenge yose y’Igihugu.

Umuhango wo gutangiza Urugerero wabereye mu Murenge wa Rukomo mu Karere ka Nyagatare, kuwa 25 Nzeri 2023, witabirwa n’abayobozi batandukanye barimo Umunyambanga Mukuru Munezero Clarisse.

Munezero yasabye uru rubyiruko kurushaho kwimakaza indangagaciro zo gukunda Igihugu no gukorana umurava ibikorwa bigamije guhindura ubuzima bwabo nk’urubyiruko n’ubw’Abanyarwanda muri rusange.

Bimwe mu bikorwa bizakorwa n’Intore ku Rugerero, harimo kubakira amacumbi abatishoboye, gufasha abaturage kuzirika ibisenge by’inzu mu rwego rwo gukumira ibiza, kurwanya imirire mibi hubakwa uturima tw’igikoni no kwigisha abaturage, kubungabunga ibidukikije haterwa ibiti no gucukura imiyoboro y’amazi, ndetse n’ubukangurambaga kuri gahunda za Leta zitandukanye.

Urugerero rukorwa iminsi 5 mu cyumweru kuva ku wa Mbere kugeza ku wa Gatanu, aho urubyiruko bakora ibikorwa bisanzwe iminsi 4, ku wa 5 bagahabwa ibiganiro bakanatozwa akarasisi n’Intambwe y’Intore y’Ingabo Nziza n’iya Mutimawurugo.

IBIGANIRO BIZATANGWA

Ku munsi wo gutangiza Urugerero hatanzwe ikiganiro kijyanye n’amateka y’Urugerero n’uruhare rw’urubyiruko mu kubaka u Rwanda twifuza.

Ibindi biganiro biteganyijwe ni ibi bikurikira:

•  Amateka y’Itorero n’Umuco w’Ubutore;
•  Ibibazo bigaragara mu rubyiruko (ibiyobyabwenge, inda ziterwa abangavu, icuruzwa ry’abantu, imirimo mibi ikoreshwa     abana, ikibazo cy’ibura ry’imirimo, ubuzererezi…);
• Imitekerereze n’isesengura biganisha ku byemezo n’amahitamo akwiye (Critical thinking, personal responsibility and positive choices);
• Amateka yaranze u Rwanda mu gihe cy’abakoloni na politiki mbi y’ivangura n’amacakubiri byimitswe na Repuburika ya Mbere n’iya Kabiri;
• Itegurwa n’ishyirwa mu bikorwa rya Jenoside yakorewe Abatutsi; uruhare rw’urubyiruko mu kurwanya ingengabitekerezo yayo, no guhangana n’ihakana n’ipfobya bya Jenoside yakorewe Abatutsi;
• Ihungabana, ubudaheranwa, kwigirira icyizere no kwishakamo ibisubizo;
• Uruhare rw’urubyiruko mu kwihangira umurimo ;
• Ndi Umunyarwanda, Icyomoro n’igihango mu kubaka ubumwe bw’Abanyarwanda;
• Kwishyira hamwe kw’Abanyafurika (Pan-Africanism);
• Ikoranabuhanga mu rubyiruko nk’isoko y’iterambere no kwihutisha serivisi;
• Uruhare rw’urubyiruko mu kurwanya akarengane, ruswa n’ibyaha bifitanye isano na yo;
• Indangagaciro Inkomezabigwi zikomora ku mateka y’Urugamba rwo kubohora Igihugu.

Gahunda yo kwitangira u Rwanda ku Rugerero ni iteme rihuza ibya kera n’iby’ubu hagamijwe kubaka ubumwe, kwigira n’ubudaheranwa mu banyarwanda.

Urugerero rutuma Abanyarwanda cyane cyane abakiri bato bamenya amateka n’umuco by’u Rwanda, batora ishyaka ry’u Rwanda ribaremamo kurukunda, kurwitangira no kwimakaza ubumwe bw’Abanyarwanda.

Kwitangira u Rwanda ku Rugerero bizakomeza kunganira gahunda za Leta zisanzweho zubaka ubumwe, kwimakaza indangagaciro, gukunda u Rwanda, kunoza umurimo bigeza Abanyarwanda n’urubyiruko by’umwihariko ku kwigira no kwihesha agaciro.

Gahunda y’Urugerero ishyirwaho n’Itegeko Nshinga rya Repubulika y’u Rwanda ryo mu 2003 nk’uko ryavuguruwe muri 2015, cyane cyane mu ngingo yaryo ya 48, ikanashimangirwa na Gahunda y’Igihugu yo kwihutisha iterambere (NST-1) ingingo 107. Urugerero rw’uyu mwaka rukaba rufite insanganyamatsiko igira iti: “Duhamye umuco w’Ubutore ku Rugerero”.

Uru Rugerero rw’Inkomezabigwi ruzasozwa tariki ya 18/12/2023.