Kuri uyu wa 3 Ukwakira 2024, Umuvugizi w’Urwego rw’Igihugu rw’Ubugenzacyaha (RIB) Dr Murangira Thierry, yaganirije Icyiciro cya Kane cy'abarimu bigisha amateka mu mashuri yisumbuye bari mu mahugurwa i Nkumba, ku kurwanya ingengabitekerezo ya jenoside n'ibyaha bifitanye isano na yo mu mashuri. 

Yagaragaje ko ibyaha bifitanye isano n’ingengabitekerezo ya jenoside ari birindwi bikurikira: guhakana jenoside; gupfobya jenoside; guha ishingiro jenoside; kuzimiza cyangwa gutesha agaciro ibimenyetso cyangwa amakuru byerekeye Jenoside; kwiba cyangwa kwangiza imibiri y’abazize Jenoside; gusenya, konona cyangwa gutesha agaciro urwibutso rwa jenoside cyangwa ahashyinguye imibiri y’abazize jenoside; no guhohotera uwacitse ku icumu rya jenoside.

Mu kiganiro yabahaye, yabasobanuriye ibikorwa bigize ibyo byaha, n'uburyo bwo kubyirinda mu gihe bigisha amateka y'u Rwanda. 

Yabasabye kurushaho gusobanukirwa amateka nyayo y'u Rwanda, bityo na bo bikabafasha mu kuyigisha neza nta kuyagoreka, kuko kuyagoreka ari byo bivamo ibyaha. 

By’umwihariko, yabasabye gukumira no kurwanya ihakana rya Jenoside yakorewe Abatutsi kuko risenya ubumwe bw'Abanyarwanda kandi ubumwe ari yo nkingi Igihugu cyacu cyubakiyeho; kurandura burundu ingengabitekerezo ya jenoside n'ibyo igaragariramo byose; no kurwanya amacakubiri n'ivangura aho biva bikagera. 

Yasabye abarimu bitabiriye aya mahugurwa kugira uruhare rugaragara mu guca uruherekane rw'ingebitekerezo ya jenoside hagati y'ababyeyi n'abana igenda igaragara mu bana bamwe, no kudahishira bamwe mu barimu bagaragaraho ingengabitekerezo ya jenoside.

Aya mahugurwa abera mu Kigo cy’Ubutore cya Nkumba azitabirwa n’abarimu b’amateka bo mu Turere twose tw'Igihugu bari mu byiciro bitandatu.

Aya mahugurwa azitabirwa n’abarimu 2949; akaba azasozwa ku wa 14 Ukwakira 2024.