Kuwa mbere tariki ya 2 Ukwakira 2023, Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascene yatangije ku mugaragaro Ukwezi kwahariwe Ubumwe n’Ubudaharenwa bw’Abanyarwanda mu Ntara y’Iburengerazuba, mu gikorwa cyabereye mu Karere ka Karongi mu Murenge wa Gishyita, asaba abaturage kwimakaza ubumwe n’ubudaheranwa nk’indangagaciro dukomora ku bakurambere bacu.

Yagaragaje uburyo ubumwe bw’Abanyarwanda ari inshingano abakurambere bari bakomeyeho bugasenywa n’ubutegetsi bubi bwa gikoloni, ubwa PARMEHUTU na MRND byashojwe na Jenoside yakorewe Abatutsi, agaragaza ibiranga politiki nziza yo kubaka u Rwanda rwa twese kuva mu 1994, akangurira abakoze Jenoside kugaragaza ukuri, ku miryango yabo, ku bo biciye no ku buyobozi bw’Igihugu kugira ngo ubwiyunge bukomeze.

Yasobanuye imiterere n’akamaro k’indangagaciro y’ubudaheranwa mu mateka y’u Rwanda, akangurira abakuru n’abato kuyigenderaho ngo ibafashe kutaganzwa n’ibikomere byatewe n’ubutegetsi bubi, ibikomere bya Jenoside yakorewe Abatutsi no gutsinda ingaruka zayo dufatanyije nk’abasangiye u Rwanda n’Ubunyarwanda.

Yashishikarije urubyiruko gukora ibishoboka byose ngo badaheranwa n’ibikomere by’amateka, kuko baramutse baheranwe na byo batatera imbere ngo banafashe Igihugu kugera ku cyerekezo cyihaye, aho cyifuza ko mu mwaka wa 2050 kizaba ari Igihugu cyubakiye ku muco kandi cyihagije.

Muri uku kwezi k’Ubumwe n’Ubudaheranwa, Minisitiri Dr Bizimana yasabye Abanyarwanda mu byiciro byose kuzaganira ku ntambwe imaze guterwa mu kubaka Ubumwe n’Ubudaheranwa, bafata umwanya munini wo gusesengura inzitizi nyazo zibangamiye imibanire y’abaturage ku midugudu banafate ingamba.

Mu nzitizi zibangamiye ubumwe n’ubudaheranwa bw’Abanyarwanda harimo:

• Kwironda bishingiye ku moko, aho abantu baturuka cyangwa bavuka, no ku tundi dutsiko utwo ari two twose turangwa n’ivangura;
• Guhisha nkana no kwinangira gutanga amakuru y’ahakiri imibiri y’abazize Jenoside yakorewe Abatutsi itarashyingurwa mu cyubahiro;
• Ibibazo by’ihungabana rikomoka kuri Jenoside yakorewe Abatutsi bigira ingaruka ku mibanire y’imiryango n’imyitwarire mu rubyiruko;
• Ikwirakwizwa ry’imvugo zibiba urwango n’ingengabitekerezo ya Jenoside mu karere u Rwanda ruherereyemo no mu mahanga.
• Kugoreka ukuri kw’amateka yaranze u Rwanda muri rusange n’ayaranze Jenoside yakorewe Abatutsi by’umwihariko.

Muri uyu mwaka wa 2023, Ukwezi kwahariwe kuzirikana Ubumwe bw’Abanyarwanda gufite insanganyamatsiko igira iti: “UBUMWE BWACU: ISHINGIRO RY’UBUDAHERANWA”.

Iyi nsanganyamatsiko iradufasha kuzirikana ko ibyagezweho byose byubakiye ku mahitamo meza Abanyarwanda bagize yo KUBA UMWE. Iratwibutsa kandi ko buri munyarwanda agomba kugira uruhare rutaziguye mu gusigasira ibyagezweho, gukumira no kurwanya icyo ari cyo cyose gishobora gutanya Abanyarwanda.

Ukwezi k’Ubumwe n’Ubudaheranwa, ku rwego rw’Igihugu kwatangirijwe mu Karere ka Nyamagabe, mu Ntara y’Iburasirazuba gutangirizwa mu Karere ka Ngoma, mu Ntara y’Iburengerazuba gutangirizwa mu Karere ka Karongi, mu Ntara y’Amajyaruguru gutangirizwa mu Karere ka Gakenke, mu gihe mu Mujyi wa Kigali kwatangirijwe mu karere ka Nyarugenge.