Kuri uyu wa 11 Ukwakira 2024, Minisitiri Dr Bizimana Jean Damascene yifatanyije n'abayobozi n'abagize Ihuriro ry'Ubumwe n'Ubudaheranwa mu Karere ka Nyamasheke mu biganiro bigamije kwimakaza Ubumwe n'Ubudaheranwa bw'Abanyarwanda. 

Ibi biganiro  byateguwe na MINUBUMWE ifatanyije n'abafatanyabikorwa bayo, biri kubera mu turere twose, mu rwego rwo kwizihiza uku kwezi k'Ukwakira kwahariwe Ubumwe n'Ubudaheranwa bw'Abanyarwanda.

Mu gutangiza ibiganiro, Minisitiri Dr Bizimana yibukije ko u Rwanda rwateye intambwe ishimishije mu kongera kubaka ubumwe n’ubudaheranwa bwasenywe bikomeye n’imiyoborere mibi yaganishije kuri Jenoside yakorewe abatutsi. 

Yagaragaje ko ibi biganiro ari umwanya mwiza wo gusuzuma urugendo ku ntambwe tumaze gutera, inzitizi zigihari, n’ingamba zafatwa kugira ngo dukomeze kugera ku iterambere rishingiye ku muco nyarwanda, indangagaciro zawo na kirazira.

Yabibukije ko ubumwe bw’Abanyarwanda ari indangagaciro remezo Abanyarwanda bagenderaho kuva Igihugu cyabaho, nk’uko bigaragarira mu zindi ndangagaciro z’umuco nko gusabana, gufatanya, kugabira abakene, n’izindi. 

Ibi bivuze ko Igihugu gitera imbere ari uko gishingiye ku mateka yacyo, ari cyo gituma Abanyarwanda barebera hamwe aho indangagaciro na kirazira byabafashije gutera imbere, bakanasuzuma inzitizi zibangamira iterambere ryabo, bagafata ingamba.

Yakomoje ku budaheranwa bugaragarira mu buryo Abanyarwanda basuzumira hamwe ibibazo bagize, nka Jenoside yakorewe Abatutsi, bakabishakira ibisubizo nk’Inkiko Gacaca zazanye ubutabera bwunga, Girinka na gahunda y’Ubudehe yatumye Abanyarwanda benshi bava mu bukene. 

Yashimangiye ko indangagaciro y’umurimo nayo igaragaza ubudaheranwa bw’Abanyarwanda, kuko kugirango bagire icyo bageraho, bivane mu bibazo, batere imbere, byabasabye gukora cyane.

Minisitiri yagarutse kandi kuri bimwe mu bibazo biri buganirweho muri iri huriro nk’amacakuri akomoka ku murage mubi twasigiwe n’abakoloni, abahagarariye imiryango ishingiye ku myemerere bitwaza inyigisho z’ibinyoma bakayobya Abanyarwanda, ikoreshwa nabi ry’imbuga nkoranyambaga, ikoreshwa ry’ibiyobyabwenge cyane cyane mu rubyiruko, umwiryane ukirangwa mu miryango, n’ibindi.

Yasoje asaba ko ibi biganiro biba umwanya wo gusuzuma intambwe yatewe ariko tukareba n’imbogamizi zigihari hanyuma hagafatwa ingamba zo kuzikemura. Yavuze Kandi ko ibizava muri ibi biganiro bizafasha mu kwegeranya ingamba zizagarukwaho mu Ihuriro nk’iri ku rwego rw’Igihugu.