Ku wa Gatandatu tariki ya 4 Kamena 2022, Minisitiri w’Ubumwe  bw’Abanyarwanda n’Inshingano Mboneragihugu Dr. Jean Damascène Bizimana yitabiriye umuhango wo Kwibuka ku nshuro ya 28 imiryango yazimye muri Jenoside yakorewe Abatutsi 1994.  Ni igikorwa cyateguwe n’umuryango GAERG na AERG kikaba cyarabereye ku Rwibutso rwa Jenoside rwa Kigali ku Gisozi.

Igikorwa ngarukamwaka kiba gifite insanganyamatsiko  igira iti: “Ntukazime Nararokotse” kigamije  Kwibuka no guha icyubahiro abari bagize imiryango irenga ibihumbi 15  barenga ibihumbi  mirongo itandatu n’umunani   bishwe muri Jenoside ku buryo nta n’umwe wasigaye mu muryango.

Mu ijambo yagejeje ku bitabiriye icyo gikorwa, yifashishije ibyanditswe n’umwanditsi w’Umuyahudi warokokeye mu nkambi ya Auschwitz, Primo Levi yasabye ababyeyi kubwira abana amateka ya Jenoside yakorewe Abatutsi kuko iyo itsinda ry’abantu rihuye na Jenoside ritagomba kuyibagirwa ahubwo bigomba kuvanamo amasomo atuma baharanira ko itazongera kubaho.  Mu gitabo cy’uwo mwanditsi cyitwa “Si c'est un homme” ugenekereje mu Kinyarwanda (iyo wibuka ko uri umuntu) aho yanditse abwira abicanyi ngo: “Ntimuzabyibagirwe, oya ntimuzabyibagirwe! aya magambo muyahoze ku mutima,  mubitekerezeho iwanyu, muri mu rugendo, mugiye kuryama, mubyutse, mubisubiriremo abana banyu, nubwo inzu yabagwa hejuru, nubwo mwaba mushegeshwe n’indwara,kugira ngo abana banyu batazigera bakora nkamwe”.

Yakomeje ashimira GAERG kuba yarafashe iya mbere mu guha igihugu inshingano yo Kwibuka no kubera aho batari  Abatutsi  bishwe bagashira burundu. Yavuzeko bigaragaza ubukana jenoside yakorewe Abatutsi yakoranywe kuko ibyiciro byose byari biyirimo kugeza n’aho bamwe mu babyeyi bayishoyemo mo abana. Yaboneyeho rero gusaba ababyeyi gutoza abakiri bato umuco w’ubupfura kugira ngo jenoside ntizasubire kuba aho ariho hose.