Kuri uyu wa 17 Gicurasi 2024, Minisitiri Dr Bizimana Jean Damascene n'abandi bayobozi, bitabiriye igikorwa cyo Kwibuka ku nshuro ya 30 Jenoside yakorewe Abatutsi muri Arikidiyosezi ya Kigali, ku Rwibutso rwa Musha ruherereye mu Karere ka Rwamagana rushyinguyemo Abatutsi barenga ibihumbi 23. 

Mu kiganiro yatanze, yashimiye Kiliziya Gatolika ko yemeye ko Kiliziya za Ntarama na Nyamata zihindurwa Inzibutso za Jenoside kugira ngo amateka y’ubwicanyi bwazikorewemo azahore abera isomo u Rwanda n’Isi. 

Yashimye Diyosezi zitegura ibikorwa byo Kwibuka, ashishikariza izibikora rimwe na rimwe n’iya Kabgayi itarabitangira, kubishyira muri gahunda ihoraho ya buri mwaka.

Yagaragaje uruhare rw’abapadiri mu itegurwa n’ishyirwa mu bikorwa rya Jenoside yakorewe Abatutsi, barimo Athanase Seromba na Emmanuel Rukundo.

Yerekanye ko nubwo hari abapadiri bashyigikiye umugambi wa Jenoside, ariko hari n’abawurwanyije, barwana ku Batutsi banicanwa na bo barimo Anania Rugasira, Bosco Munyaneza, Yozefu Gatare, Augustin Nkezabera, Baoudouin Busunyu, n’abandi.

Yagaragaje ko 90% by’abagize uruhare muri Jenoside bari abantu bakiri bato bafite munsi y’imyaka 40, ariko kubera kurererwa muri politiki y’urwango babeshywa ko Abatutsi bashaka kugarura ingoma ya cyami ngo yakandamizaga Abahutu, babyizera uko kandi ari ikinyoma.

Yasabye abakuru n’abato gukomeza kuzirikana inshingano duhuriyeho twese nk’Abanyarwanda yo kwibuka Jenoside yakorewe Abatutsi, twubaka u Rwanda ruzira ivangura n’ingengabitekerezo ya jenoside, duharanira ko politiki y'urwango itazongera guhabwa intebe ukundi.

Reba ikiganiro kirambuye mu buryo bw’amashusho.