Uyu munsi ku wa 10 Gashyantare 2024, Minisitiri Dr Bizimana Jean Damascene yifatanyije n'urubyiruko rwo mu Ntara y’Amajyaruguru mu biganiro "Rubyiruko, menya amateka yawe" byabimburiwe no kunamira inzirakarengane zishyinguye mu Rwibutso rwa Jenoside rwa Musanze.

Mu ijambo yabagejejeho, yerekanye urugendo rwatangijwe n'abakoloni rwo gusenya ubumwe bw'abanyarwanda bakoresheje ibipimo bitiriye siyansi mu guhimba amoko y'abahutu, abatutsi, n'abatwa.

Yagaragaje ko abakoloni bateguye Abanyarwanda mu mashuri yabo babigisha urwango, kugeza ku muri 1962, aho babashingiye ubutegetsi bushingiye ku ivangura no guheza bamwe.

Kuva ku bwigenge, iyo politiki yo kwanga Abatutsi yatangiye kubafata nk'abagome b'abanyamahanga yakomereje mu byiciro byose by'ubuzima bw'Igihugu nk'uburezi, imibereho y'abaturage n'ubutegetsi.

Zimwe mu ngero yatanze ni politiki y'iringaniza yashyizweho na Perezida Habyarimana yagenaga ijanisha ry'abahabwa amashuri n'imirimo hashingiwe ku moko n'Uturere, yatumye Abatutsi bagira imibereho mibi.

Imibereho mibi ubutegetsi bwa PARMEHUTU ya Perezida Kayibanda na MRND ya Perezida Habyarimana bwashyiragamo Abatutsi byari bigize icyaha cya jenoside. Ibyo byagaragajwe n'amaperereza mpuzamahanga cyane cyane hagati ya 1990 na 1993.

Baganiriza urubyiruko, Nyirahonora Théophile warokotse Jenoside yakorewe Abatutsi yabasangije amateka y'ivanguramoko ryagejeje kuri Jenoside yakorewe Abatutsi, yibanda ku ihezwa ry'Abatutsi mu mashuri no mu mirimo, naho Karamaga Thadée abaganiriza ku rwango n'amacakubiri mu zahoze ari ingabo z'u Rwanda.

Umwe mu rubyiruko Shami Teta Sandra yabajije Umurinzi w'Igihango Karamaga Thadée ati, "Ni iki cyaguteye gukora ibikorwa by'ubutwari muri Jenoside mu gihe benshi bitabiraga ubwicanyi?" aramusubiza ati, "Ni urukundo rw'Igihugu, ni ugusigasira igihango cy'Abanyarwanda."

Ibiganiro bya “Rubyiruko, menya amateka yawe” bigamije kuganira ku mateka ya Jenoside yakorewe Abatutsi hifashishijwe gihamya z’ubuzima bw’abaganirira urubyiruko.

Bifasha mu kwigisha urubyiruko ingaruka z’amahitamo (guhitamo nabi cyangwa neza), indangagaciro zikwiye kuranga Umunyarwanda ukunda Igihugu cye (ubutwari, ubwitange no gukunda Igihugu) ziri mu byashingiweho abari urubyiruko biyemeza guhaguruka bakabohora u Rwanda ari nako bahagarika Jenoside yakorerwaga Abatutsi.

Ibi biganiro kandi bituma urubyiruko rurushaho gusobanukirwa uruhare rwabo mu gusigasira amateka y’u Rwanda, kurinda ibyagezweho no gutegura u Rwanda rw’ejo nk’abaragwa barwo.