Kuri uyu wa 24 Ukwakira 2024, Minisitiri Dr Bizimana Jean Damascene yatangije Itorero "Imbuto Zitoshye" ribera mu Kigo cy’Ubutore cya Nkumba; ryitabiriwe n’urubyiruko rusoje amashuri yisumbuye rwishyuriwe n’Umuryango Imbuto Foundation binyuze mu mushinga Edified Generation. 

Ni Itorero rigamije kubahugura no kubatoza uburyo bw’imibereho, amateka y’Igihugu, indangagaciro na kirazira by’umuco nyarwanda, n’imyifatire bikwiye kubaranga, Icyerekezo cy’Igihugu n’uruhare rwabo mu kukigeraho ndetse n’ibindi byose bigamije kubagira urubyiruko rwifuzwa.

Minisitiri Dr Bizimana yabahaye ikiganiro ku bumwe bw’Abanyarwanda mu mateka y’Igihugu, isenyuka ryabwo, icengezamatwara ry’urwango mu Banyarwanda, itegurwa n’ishyirwa mu bikorwa rya Jenoside yakorewe Abatutsi, n'imiterere y’ipfobya n’ihakana ryayo.

Yasabye urubyiruko kubyaza umusaruro amahirwe bafite yo kugira ubuyobozi bukunda Abanyarwanda, bubigisha ko buri Munyarwanda afite icyubahiro, agaciro n’ishema kimwe n’undi. Bitandukanye n’urubyiruko rwabayeho mu myaka 35 yabanjirije Jenoside yakorewe Abatutsi (1959-1994), bakuze batozwa urwango, ivangura, irondabwoko, irondakarere n’ingengabitekerezo ya Jenoside; byatumye boreka u Rwanda kubera ubwo burere bubi bahawe.

Yabasabye ko inyigisho bazahabwa muri iri Torero bazazishingiraho bimakaza kwishakamo ibisubizo kuko ak’imuhana kaza imvura ihise, bashyira imbere ubumwe bw’Abanyarwanda, gukunda Igihugu, ubupfura, gukunda umurimo no kuwunoza, ubudaheranwa, n’izindi ndangagaciro z’umuco nyarwanda.

Inyigisho zizatangirwa muri iri Totero, zitegerejweho gufasha abagenerwabikorwa ba Imbuto Foundation kwigirira akamaro no kukagirira abandi mu muryango nyarwanda, kubongerera ubumenyi bwunganira ubwo mu ishuri barangwa n’indangagaciro z’umuco nyarwanda mu byo bakora byose.

Iri Torero ry’iminsi irindwi kandi rizaha umwanya Umuryango Imbuto Foundation n’abafatanyabikorwa bawo wo gusuzumira hamwe no gufata ingamba ku mbogamizi bahura na zo, zishobora kugira ingaruka ku buzima no ku myigire yabo muri rusange.