Minisitiri Dr Bizimana Jean Damascene yifatanyije n'abanyamuryango, inshuti n'abafatanyabikorwa b’Umuryango AVEGA Agahozo muri Kigali Convention Centre, mu gikorwa cyibanda ku rugendo rw'ubudaheranwa, abapfakajwe na Jenoside yakorewe Abatutsi mu 1994.

Jenoside yakorewe Abatutsi mu 1994 yasize ibikomere byinshi, ariko abayirokotse ntibahwemye kwiyubaka no kubaka Igihugu. Ni muri urwo rwego, AVEGA Agahozo yateguye igikorwa cyibanda ku rugendo rw’ubudaheranwa bamazemo imyaka 30.

Mu ijambo rye, Minisitiri Dr Bizimana Jean Damascene yashimiye abanyamuryango ba 

Avega Agahozo ku bw'ubudaheranwa bubaranga bakomora ku mateka y'itotezwa ry'Abatutsi kuva igihe ryatangiraga mu myaka ya 1960 kugeza Jenoside yakorewe Abatutsi ihagaritswe na FPR-Inkotanyi.

Yagaragaje ko kuva ku butegetsi bwa President Kayibanda, abapfakazi b'Abatutsikazi batsinze agahinda batewe no kwicirwa abagabo n'abana b'abahungu, kwamburwa imitungo yabo, kwimwa ubutabera, kwirukanwa ku kazi, no gutoteza abanyamahanga bageragezaga kubafasha.

Yibukije ko ku butegetsi bwa President Habyarimana itotezwa ry'Abatutsi ryakomeje mu nzego zose z'Igihugu, ndetse abagore n'abakobwa bagafatwa ku ngufu bakanicwa.

Yashimye ubutwari bw' abahohotewe ashingiye ku buhamya batanze mu Rukiko Mpuzamahanga Mpanabyaha rwashyiriweho u Rwanda ruri Arusha, kuko gufata ku ngufu byashyizwe mu byaha bya jenoside bwa mbere mu mateka y'Isi.

Yasoje abizeza ko Leta y'u Rwanda izakomeza kubaba hafi no gusigasira ubumwe n'ubudaheranwa bw'Abanyarwanda bose.