Kuri uyu wa 16 Ugushyingo 2024, Minisitiri Dr Bizimana Jean Damascene yagaragarije abitabiriye Ihuriro rya 17 ry’Umuryango Unity Club ishusho y’ubudaheranwa bw’Abanyarwanda yerekanwa n’ubushakashatsi bwo mu mwaka wa 2023.

Ubwo bushakashatsi bwakozwe na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), bwari bugamije kwerekana uruhare rw'ubudaheranwa mu gufasha Abanyarwanda gukira ibikomere by'amateka no kwikemurira ibibazo.

Nk’uko Minisitiri Bizimana yabigarutseho, ubwo bushakashatsi bwagaragaje ko 99% by’Abanyarwanda babajijwe, bahamije ko bashyize imbere Ubudaheranwa no kwimakaza ihame ry’Ubumwe bw’Abanyarwanda; mu gihe 80% by’Abanyarwanda bagaragaza ko Umunyarwanda ku giti cye yemera uruhare rw’ubudaheranwa bw’Abanyarwanda mu komora ibikomere by’amateka.

Bwerekanye kandi ko 77% by’Abanyarwanda bemeza ko ubudaheranwa bwabo bufite uruhare mu guteza imbere umuryango; mu gihe 86% bemera ko Umuryango mugari w’Abanyarwanda ushingiye ku budaheranwa bwabo n’indangagaciro zabwo.

Minisitiri yakomeje agaragaza ko ubwo bushakashatsi bwerekanye ko Abanyarwanda 85% bemeza ko Inzego z’Imiyoborere zubakitse zishingiye ku ndangagaciro z’ubudaheranwa; mu gihe ibyaha byerekeranye n’ingangabitekerezo ya jenoside n’ibyaha bijyana na yo byagabanutseho 14% kuva mu mwaka wa 2020.

Nyuma y’imyaka 30 u Rwanda rwibohoye, rumaze kuba Igihugu buri wese yifuza guturamo, kubyariramo no kurereramo. Ibyo bikomoka ku mahitamo y’Abanyarwanda yo kubakira ku bumwe, bikaba kandi umusaruro w’imiyoborere myiza n’ubufatanye bw’inzego zitandukanye harimo iza Leta, imiryango itari iya Leta, imiryango ishingiye ku myemerere n’abikorera.

Ihuriro rya 17 rya Unity Club, rigamije gukomeza kwimakaza umuco w’ibiganiro byubaka kandi bishimangira indangagaciro na kirazira z’umuco nyarwanda, Ndi Umunyarwanda igakomeza kuba Igitekerezo ngenga cy’Ukubaho kwacu. 

Ibiganiro byatanzwe muri iri huriro, byari bifite intego zo gusobanukirwa amateka y’imiyoborere y’Igihugu; kugaragaza indangagaciro na kirazira z’umuco nyarwanda zikwiye kuyobora imyumvire, imitekerereze, imyitwarire n’imikorere ihamye y’Abanyarwanda; gusobanura inkingi fatizo z’Ubumwe n’Ubudaheranwa bw’Abanyarwanda no gufata ingamba zo kuzubakiraho kugira ngo zidufashe guhangana n’ibikibangamiye ubumwe bw’Abanyarwanda; gusobanura ubwuzuzanye bw’umuco, imyemerere n’imiyoborere mu iterambere ry’Igihugu no kubaka umuryango nyarwanda; ndetse no kubyutsa Ihuriro ry’Ubumwe n’Ubudaheranwa mu Karere kugira ngo rirusheho gutanga umusaruro.