Kuri uyu wa Kabiri tariki ya 12 Mata 2022 Minisitiri w’Ubumwe bw’Abanyarwanda n’Inshingano Mboneragihugu Dr.  Jean Damacggene BIZIMANA yifatanyije n’abaturage bo mu Karere ka Kayonza – Mukarange mu gikorwa cyo Kwibuka abazize Jenoside yakorewe Abatutsi ku nshuro ya 28. Tariki ya 12 Mata muri 1994, Abatutsi bari baturutse mu bice bitandukanye bahungiye kuri Paruwasi ya Mukarange bishwe bagabweho igitero n'interahamwe ndetse n'abasirikare.

Mu ijambo yabagejejeho, Minisitiri Bizimana yihanganishije abarokotse Jenoside yakorewe Abatutsi mu 1994 bo muri Mukarange no muri Kayonza muri rusange. Yavuze ko nta Jenoside ibaho iyo leta itabigizemo uruhare kandi ko ibanzirizwa no kubiba urwangano n'amacakubiri mu baturage. Yibukije ko mu bihe bitandukanye, Abatutsi bagiye batotezwa, abandi bakicwa haba muri za Nyarubuye, Mushubi, Nyundo, Mibirizi n’ahandi.

Yabahumurije agira ati: "Dufite amahirwe yo kuba dufite ubuyobozi bwiza burangajwe imbere na Nyakubahwa Perezida wa Repubulika Paul Kagame, buha buri munyarwanda wese icyubahiro, amahoro n'ishema akwiye, kandi burwanya amacakubiri”.

Minisitiri Bizimana yasoje asaba ababaye muri aya mateka y’urwango n’itotezwa byagejeje u Rwanda kuri Jenoside yakorewe Abatutsi gutanga ubuhamya kugira ngo ukuri gukomeze kumenyekana ndetse n’ahakiri imibiri itarashyingurwa mu cyubahiro bikorwe kuko bifasha cyane abacitse ku icumu.

Minisitiri Bizimana yijeje Abacitse ku icumu rya Jeniside yakorewe abatutsi mu 1994 ko Leta izakomeza kubaba hafi no kubafasha gukomeza gutera imbere. #Kwibuka28