Uyu munsi, ku wa 31 Gicurasi 2024, mu Kigo cy’Ubutore cya Nkumba, Umunyamabanga Uhoraho Uwitonze Mahoro Eric yitabiriye igikorwa cyo gusoza Itorero ry’abatoza b’Intore 300 bagizwe n’Abarinzi b’Igihango, Abarezi, Urubyiruko, Abagore, n’Abagize Ihuriro ry’Ubumwe ku Karere.

Mu ijambo rye, Umunyamabanga Uhoraho @Erimahoro1, yabibukije ko ubumwe n’ubudaheranwa bikwiye kubaranga mu mikorere yabo. Ati, ti: “Itorero rikora neza mu mashuri no mu midugudu rishobora kuba igisubizo kirambye mu kubaka umuryango, nk’ishingiro ry’amajyambere.”

Yabasabye ko ibiganiro bahawe bibabera igisubizo mu gutoza indangagaciro na kirazira mu muryango nyarwanda. Yongeraho ko Itorero ry’Umudugudu n’Itorero mu mashuri bigiye gushyirwamo imbaraga hashingiwe ku myanzuro bafashe, kugira ngo rikemure ibibazo bihari.

Yasoje abasaba kwirinda imigirire ya “hato bitanturukaho”, abasaba gushirika ubwoba bagashyira mu bikorwa inshingano zabo, kuko Igihugu kiba cyashyize imbere imikorere myiza, na politiki yo gusigasira Ubumwe n’Ubudaheranwa.

Ni Itorero rimaze iminsi itatu, kuva tariki 29 kugeza 31 Gicurasi 2024, rigamije kubongerera ubumenyi ku biganiro bizajya bitangwa, uburyo bwo kubitanga n’umurongo mushya w’imikorere y’Itorero mu mashuri no mu midugudu.

Iri torero ryabanjirijwe n’umwiherero w’iminsi 2 wahuje MINUBUMWE n’abakozi b’Uturere bashinzwe Itorero n’Ubukangurambaga, n’abakozi bashinzwe Uburezi mu Turere, kuva tariki 28-29 Gicurasi, hagamijwe gusuzuma imikorere y’Itorero ry’Umudugudu no mu mashuri.