Minisitiri Dr Bizimana Jean Damascene yashyize ibuye ry’ifatizo ahazubakwa isoko rya kijyambere mu Kagari ka Kabagesera mu Murenge wa Runda mu Karere ka Kamonyi, mu gikorwa cyo gutangiza Urugerero rudaciye ingando rw'Inkomezabigwi icyiciro cya 12, ku rwego rw'Igihugu, kuri uyu wa 13 Mutarama 2025.

Mu ijambo yagejeje ku bitabiriye igikorwa cyo gutangiza uru Rugerero, yasabye urubyiruko ruzarwitabira kuzarangwa n’umurava mu bikorwa bizamura imibereho myiza y’abaturage n’iterambere ry’Igihugu byateguwe n’inzego z’ibanze, aho mu Karere ka Kamonyi bazubaka isoko rya kijyambere, uturima tw’igikoni, irerero, icyumba mpahabwenge mu ikoranabuhanga n’ibindi.

Minisitiri yabasabye kandi kuzafasha inzego z’ibanze mu bukangurambaga burimo kurwanya imirire mibi, gukangurira ababyeyi kujyana abana ku ishuri, guca ubuzererezi, kurwanya inda ziterwa abangavu, kwirinda sida, kurwanya ibiyobyabwenge n’ibindi bibujijwe n’amategeko.

Yagaragaje ko ubukangurambaga ari ingenzi kuko iterambere rituruka mu myumvire, abasaba by’umwihariko kuzagira uruhare rukomeye mu bukangurambaga bwo kurwanya ingengabitekerezo ya jenoside bimakaza ubumwe bwacu, abasaba ko ingengabitekerezo ya jenoside bazayirwanya bakayinesha baharanira ko isigara ari amateka mu gihugu cyacu.

Yasoje abibutsa ko ibyo bize mu Itorero ry’Inkomezabigwi icyiciro cya 12 ryabaye kuva tariki 27-30 Ukuboza 2024 bikwiye kubabera impamba ituma buri gitondo babyukana ishyaka, ubutwari no gukunda Igihugu, bizabafasha kugera ku ntego z’Urugerero bagiyeho; abasaba guharanira ko ubwitabire buba 100% kandi buri munsi.

Urugerero rw’Inkomezabigwi icyiciro cya 12, rwitabiriwe n’Intore zarangije amashuri yisumbuye mu mwaka w’amashuri 2023-2024 mu Turere twose, barimo abize mu mashuri y’ubumenyi rusange, amashuri y’imyuga n’ubumenyi ngiro; amashuri nderabarezi; n’icyiciro cy’ubuvuzi (Associate Nursing Program).

Urugerero ni gahunda ya Leta ifasha Abanyarwanda kwikemurira ibibazo binyuze mu kubatoza indangagaciro zibaranga cyane cyane mu rubyiruko, rugakora ibikorwa byiza kandi rubikorera aho rutuye, baharanira gukunda Igihugu no kugiteza imbere, guharanira kugira ubumwe, n’ubwitange.

Gahunda yo kwitangira u Rwanda ku Rugerero ni umusingi w’Ubumwe, bikaba inkingi y’Iterambere ryihuse twubaka umuco wo kwigira n’ubudaheranwa mu Banyarwanda. Iyi gahunda ituma Abanyarwanda cyane cyane abakiri bato bamenya amateka n’umuco by’u Rwanda, batora ishyaka ry’u Rwanda ribaremamo kurukunda, kurwitangira no kwimakaza ubumwe bwabo.

Kwitangira u Rwanda ku Rugerero bikomeza kunganira gahunda za Leta zisanzweho zubaka ubumwe, kwimakaza indangagaciro zo gukunda u Rwanda no kunoza umurimo bigeza Abanyarwanda n’urubyiruko by’umwihariko ku kwigira no kwihesha agaciro.