Ku wa 27 Mata 2025, Minisitiri Dr Bizimana Jean Damascene yifatanyije n’abaturage b’Akarere ka Nyanza mu Kwibuka ku nshuro ya 31 Jenoside yakorewe Abatutsi, ku Rwibutso rwa Nyanza ruherereye mu Murenge wa Busasamana.

Mu kiganiro yatanze ku byaranze politiki y’ivanguramoko n’amacakubiri yagejeje kuri Jenoside yakorewe Abatutsi, yagaragaje ko Habyarimana Juvenal yatangiye gutoteza Abatutsi mu 1965 ubwo yari Minisitiri w'Ingabo na Polisi, aho yashyizeho amabwiriza yo kwima Abatutsi impapuro zo kujya mu mahanga (passports), ndetse hanyuma akambura Abatutsi bahunze uburenganzira ku mitungo yabo basize mu Gihugu.

Minisitiri Dr Bizimana yagaragaje ko mu byaranze urwango Habyarimana yangaga Abatutsi, harimo kuba muri Mata 1975 u Rwanda rwarashyize umukono ku masezerano mpuzamahanga yo gukumira no kurwanya jenoside, ariko rwifata ku ngingo ya 9 ivuga ko igihugu kitubahiriza aya masezerano gishobora gukurikiranwa mu nkiko mpuzamahanga. Habyarimana yanze kuyisinya kuko yari azi ko politiki afite ari iyo kubuza Abatutsi amahwemo no kubakorera jenoside. 

Guverinoma y’u Rwanda yasinye iriya ngingo ya 9 muri Nzeri 2008.

Kwibuka ni umwanya wo kwiga amateka no gusobanukirwa n’icyasenye ubumwe bw’Abanyarwanda kugeza hateguwe hagashyirwa mu bikorwa Jenoside yakorewe Abatutsi mu 1994, kuganira ku ngaruka zayo no kwiyibutsa umukoro dufite wo gukomeza kubaka u Rwanda twifuza, ruzira ingengabitekerezo ya jenoside.

Abanyarwanda twiyemeje guhora twibuka Jenoside yakorewe Abatutsi nk’amateka ashaririye yaranze Igihugu, dukwiye kwigiraho kugira ngo adufashe kurwanya no gukumira ingengabitekerezo y’urwango n’amacakubiri yasenye umuryango nyarwanda.

Jenoside yakorewe Abatutsi mu 1994 ni isomo Abanyarwanda twigiyeho ko ubumwe bwacu buruta ibyadutanya uko byaba bimeze kose. Amahanga na yo akwiye kwigira kuri aya mateka kugira ngo dushyize hamwe hubakwe ejo heza h’abatuye Isi.