Uyu munsi, ku wa 10 Gicurasi 2024, Minisitiri Dr Bizimana Jean Damascene n'abandi bayobozi bifatanyije n'abaturage b'Akarere ka Rulindo mu kwibuka Jenoside yakorewe Abatutsi, ku Rwibutso rwa Mvuzo ruherereye mu Murenge wa Murambi; aho muri uru Rwibutso hanashyinguwe indi mibiri 40.

Mu ijambo rye, yagaragaje ibimenyetso by'amateka byerekana imiterere y'irondabwoko n'ingengabitekerezo ya Jenoside mu Rwanda, yibanda kuri politiki y'urwango n'itoteza ryakorewe Abatutsi ku butegetsi bwa Kayibanda na Habyarimana.

Yagaragaje umugambi muremure wa Jenoside ahereye ku bwicanyi bwakorewe Abatutsi muri 1992 na 1993 muri Shyorongi na Mbogo buyobowe n'abategetsi bakuru bo muri MRND kuva kuri ba burugumesitiri Hitimana Alexandre na Twizeyimana Vincent bayoboraga izo komini.

Aba baburugumesitiri bafatanyaga n'abategetsi bo muri Hutu Pawa bakomokaga muri Kigali Ngari: Matayo Ngirumpatse wari Perezida wa MRND, Depite Habimana Bonaventure, Depite Kinyoni Stanislas, Minisitiri Munyazesa Faustin, Col Felicien Muberuka n'abandi.

Yifashishije ingero nziza z'abahanga bitandukanije na politiki rutwitsi ya MRND barimo Mfizi Christophe na Prof Jean Gualbert Rumiya, yatanze ubutumwa busaba abaturage gukomeza gushyira hamwe.

Yabasabye kubaka u Rwanda rwa twese no kurwanya ingengabitekerezo ya jenoside mu miryango kuko ariho ikunze kwigishirizwa.