Kuri uyu wa 22 Mata 2024, Minisitiri Dr Bizimana Jean Damascene yifatanyije n'abaturage bo mu Karere ka Gisagara mu gikorwa cyo kwibuka ku nshuro ya 30 Jenoside yakorewe Abatutsi, ku Rwibutso rwa Jenoside rwa Kansi. Ni Urwibutso rusanzwe rushyinguyemo Abatutsi 10.192; uyu munsi rukaba rwashyinguwemo indi mibiri 31 yabonetse.

Mu ijambo rye, yifashishije ibimenyetso by'amateka bifite gihamya zanditse, yagaragaje ko ubwicanyi bwakorewe Abatutsi kuva mu 1959-1994 iteka bwabaga bwateguwe n'ubutegetsi, bukabushakira urwitwazo, aho Abatutsi babeshyerwaga ko ari bo nyirabayazana w'ibibazo Igihugu gifite.

Yashimangiye ko urushyi bivugwa ko Sushefu wo ku Ndiza, Mbonyumutwa Dominique yakubiswe atari rwo rwatumye Abatutsi bicwa mu Gushyingo 1959, kuko abasore bane bamusagariye bafashwe bagafungwa, ntibyari kuba ngombwa rero ko Abatutsi bicwa mu Gihugu hose.

Yagaragaje ko kwicwa kw'Abatutsi, gutwikirwa no kumeneshwa mu 1959 wari umugambi w'ubutegetsi wari umaze amezi menshi ucurwa, nyuma y'aho Umwami Rudahigwa agaragaje ko u Rwanda rukeneye ubwigenge bikarakaza Ububiligi. Ni bwo Koloneli Guy Logiest yoherejwe kuza kuyobora u Rwanda avuye muri Congo, aza afite inshingano nyamukuru yo gukura Abatutsi mu butegetsi hagashyirwaho PARMEHUTU yari yubakiye ku ivanguramoko. Ibi Logiest yabyiyandikiye ubwe mu gitabo cye yise "Ma mission au Rwanda, un blanc dans la bataille Hutu-Tutsi" cyasohotse mu mwaka wa 1988.

Min. Dr Bizimana yagaragaje ko kuva ubwo, ubutegetsi bwa PARMEHUTU n'ubwa MRND bwatatiye igihango cy'Ubunyarwanda, bwibasira Abatutsi, bubakura mu mirimo no mu mashuri, ndetse bigera n'aho n'umuzungu ukoresha Umututsi yirukanwa mu Rwanda. Hari n'abapadiri birukanwe kubera kuvugira Abatutsi.

Yibukije ko kimwe mu biranga icyaha cya jenoside harimo no gushyira itsinda ry’abantu mu mibereho mibi hagamijwe kubapyinagaza, kubatera agahinda n’ibikomere bihoraho, bityo uko kujujubya Abatutsi bikaba ari jenoside. Jenoside yakorewe Abatutsi mu 1994 yaje ari umusozo.

Yasoje asaba ababyeyi gushyira imbaraga mu kurera neza abana babo, babarinda inyigisho z'ivangura n'amacakubiri, babatoza ubumwe n'izindi ndandangagaciro na kirazira by'umuco nyarwanda, kugira ngo dukomeze kubaka u Rwanda rwunze ubumwe kandi twese dufitemo uburenganzira bungana.